Me fokus në ruajtjen dhe përcjelljen e identitetit kulturor tek brezat e rinj, shkolla 9-vjeçare “Sevasti Qirjazi” në Korçë ka zhvilluar një aktivitet të veçantë në ambientet e Muzeut Kombëtar të Artit Mesjetar, si përmbyllje e projektit “Trashëgimia Kulturore dhe ndikimi i saj në turizëm”.
Nxënësit e klasës së 9-të prezantuan elementë të ndryshëm që përbëjnë trashëgiminë tonë kulturore, si legjendat, këngët popullore, zakonet, veshjet tradicionale dhe gatimet tipike, duke theksuar se trashëgimia është pasaportë e identitetit kombëtar.
Entela Prifti, mësuese në shkollë, theksoi se trashëgimia kulturore përfshin jo vetëm objektet fizike, por edhe gjuhën, zakonet, artet dhe vlerat që ndërtojnë identitetin e një populli.
Martina Çajku dhe Kledia Psari, dy nga nxënëset pjesëmarrëse, u ndalën tek rëndësia që kanë legjendat dhe tregimet popullore në formimin moral dhe kulturor të brezave të rinj, duke ndihmuar në trashëgiminë e urtësisë, guximit dhe solidaritetit.
Projekte të tilla edukative janë shembull pozitiv i angazhimit të shkollave në ruajtjen e vlerave kombëtare, duke i bërë nxënësit më të ndërgjegjshëm për rolin që luajnë në vazhdimësinë e trashëgimisë kulturore.
