Një zjarr i përmasave të konsiderueshme ka rënë mesditën e sotme në fshatin Çerravë të Pogradecit, duke krijuar shqetësim të madh për banorët e zonës dhe duke rrezikuar përhapjen në një sipërfaqe të gjerë.
Menjëherë pas sinjalizimit, në terren u angazhuan forcat e Mbrojtjes nga Zjarri dhe Shpëtimi (MZSH) Pogradec, bashkë me punonjës të Bashkisë Pogradec dhe vullnetarë nga komuniteti lokal, të cilët ndërhynë në kohë për të përballuar situatën.
Falë ndërhyrjes së shpejtë dhe të koordinuar, u bë e mundur izolimi dhe shuarja e tre vatrave të zjarrit, duke shmangur një përhapje të mundshme të flakëve në zonën përreth.
Autoritetet lokale theksojnë rëndësinë e kujdesit maksimal, duke apeluar për ndalim të rreptë të çdo zjarri të pakontrolluar, që mund të kthehet në rrezik serioz për mjedisin dhe banesat.
Ndërkohë, Policia e Pogradecit ka nisur hetimet për të përcaktuar shkaqet e zjarrit dhe për të identifikuar çdo person të dyshuar në rast se provohet zjarrvënie e qëllimshme.
