Turizmi si një forcë bashkuese dhe zhvillimore ishte në qendër të takimit të organizuar në Qarkun e Korçës nga organizata Helvetas dhe Partnerët Shqipëri për Ndryshim dhe Zhvillim, me mbështetjen e Ministrisë së Ekonomisë, Kulturës dhe Inovacionit. Ky projekt është një iniciativë e Agjencisë Zvicerane për Zhvillim dhe Bashkëpunim (SDC), që synon ndërtimin e një modeli të qëndrueshëm turizmi përmes sinergjisë midis institucioneve vendore, operatorëve turistikë dhe partnerëve mbështetës.
Kryetari i Këshillit të Qarkut Korçë, z. Erjon Nexhipi, theksoi rëndësinë e bashkëpunimit të ngushtë ndërinstitucional për të zhvilluar një destinacion turistik të mirëorganizuar, me produkte autentike që pasqyrojnë identitetin dhe potencialin rajonal.
Takimi u karakterizua nga një atmosferë bashkëpunuese dhe konstruktive, ku u shkëmbyen ide konkrete dhe energji pozitive për të ndërtuar një ofertë të integruar turistike në rajon. Në fokus të diskutimeve ishin qëndrueshmëria, përfshirja e komuniteteve lokale dhe promovimi i produkteve rajonale si baza për zhvillimin e turizmit të përgjegjshëm.
Ky projekt shënon një hap të rëndësishëm drejt përforcimit të turizmit si motor ekonomik për rajonin e Korçës, duke vendosur theksin te zhvillimi afatgjatë, bashkëpunimi ndërinstitucional dhe ndërveprimi me sektorin privat.
