Një projekt i rëndësishëm për përmirësimin e furnizimit me ujë të pijshëm do të nisë së shpejti në fshatin Zvezdë dhe në disa fshatra të tjerë të Bashkisë Maliq. Gjatë një takimi të zhvilluar në ambientet e bashkisë mes kryetarit Gëzim Topçiu dhe përfaqësuesve të Ujësjellës Kanalizime Korçë sh.a, u diskutuan dhe u ndanë detajet e fundit të këtij investimi që synon të garantojë furnizim të pandërprerë me ujë të pijshëm për banorët.
Fshati Zvezdë do të përfitojë nga një ndërhyrje e plotë në sistemin e ujësjellësit, duke i hapur rrugë furnizimit me ujë 24 orë në ditë. Po ashtu, ndërhyrje të ngjashme janë planifikuar edhe në fshatrat Pirg dhe Zëmblak, ku aktualisht hasen probleme me furnizimin e rregullt.
Kryebashkiaku Topçiu theksoi se për të siguruar një shërbim të qëndrueshëm dhe cilësor është e nevojshme, përveç investimeve, edhe vendosja e matësave të ujit dhe respektimi i detyrimeve të pagesës nga ana e qytetarëve. Ai u bëri thirrje banorëve që të ndërgjegjësohen për rëndësinë e përdorimit të rregullt dhe të drejtë të ujit të pijshëm.
Punimet për këto investime pritet të nisin brenda pak ditësh, duke sjellë një përmirësim të ndjeshëm në cilësinë e jetesës për komunitetin lokal.
