Në një atmosferë të mbushur me emocion dhe garë sportive, ekipi i vajzave nga Qarku i Korçës ka triumfuar në finalen e Edicionit të 3-të të Kampionatit Kombëtar të Ekipeve Sportive për shkollat 9-vjeçare, duke u shpallur kampione në basketboll.
Finalja e zhvilluar në Pallatin e Sportit “Feti Borova” solli përballë Korçën dhe Tiranën, dy prej ekipeve më të mira të këtij sezoni. Vajzat korçare, me një shpirt gare të admirueshëm dhe përgatitje të shkëlqyer, arritën të dominojnë ndeshjen dhe ta mbyllin atë me rezultatin bindës 39-24.
Ky sukses vjen në kuadër të projektit kombëtar “Ekipet Sportive në Shkolla”, një nismë e rëndësishme që synon të promovojë aktivitetin fizik, frymën e bashkëpunimit dhe talente të reja sportive në shkollat 9-vjeçare në të gjithë vendin.
Një meritë e veçantë i shkon edhe shkollës “Sotir Gurra” në Korçë, si dhe trajnerëve Emil Papa dhe Reinaldo Kacorri, që udhëhoqën ekipin drejt këtij suksesi të madh kombëtar.
Ky rezultat është dëshmi e potencialit sportiv që kultivohet në shkolla dhe një nxitje e fortë për të vijuar mbështetjen ndaj projekteve që lidhin edukimin me sportin.
Urime vajzave kampione të Korçës dhe gjithë skuadrave pjesëmarrëse për shpirtin sportiv dhe garën dinjitoze!
