Një tjetër vatër zjarri është aktivizuar në brendësi të Parkut Natyror të Gërmenjit, në afërsi të Shelegurit.
Pamjet e siguruara tregojnë se flakët janë përhapur pranë disa bizneseve të zonës, ndërkohë që edhe në pjesën e parkut pranë piramidave 13-14, në kufirin me Greqinë, vazhdojnë të shfaqen vatra të reja.
Megjithëse shërbimi zjarrfikës i bashkisë Kolonjë, forcat pyjore, ushtria dhe ADZM po punojnë intensivisht për shuarjen e flakëve, herë pas here shfaqen përsëri zjarre të reja, për të cilat policia dyshon se janë të qëllimshme.
Policia e Komisariatit Ersekë ka shoqëruar disa persona që kanë në përdorim kullota në këto zona, ndërsa bashkia Kolonjë u ka bërë thirrje banorëve të ndihmojnë në mbrojtjen e zonave të mbrojtura dhe kërkon që autorët e dyshuar të vihen përpara drejtësisë.
