Në fshatin Gështenjas të Pogradecit, nxënësit e shkollës 9-vjeçare “Kajo Karafili” kanë nisur vitin e ri shkollor në ambiente krejtësisht të reja e moderne. Godina është rikonstruktuar tërësisht, duke ofruar klasa bashkëkohore, palestër për zhvillimin e aktiviteteve sportive si dhe kabinete informatike me standardet më të larta për një arsimim cilësor.
Të emocionuar ishin sidomos fëmijët e klasave të para që hynë për herë të parë në bankat e shkollës, ndërsa pjesë e inaugurimit ishin kryebashkiaku Ilir Xhakolli, drejtori i ZVA Pogradec Sotiraq Mangwri dhe deputeti i zonës Bledi Çomo.
Një risi e këtij viti është edhe hapja e “smart lab”-it, i pajisur me kompjutera dhe teknologji inteligjente, që do t’u japë mundësi nxënësve të thellojnë njohuritë në fushën e shkencave kompjuterike.
Në të gjithë rrethin e Pogradecit këtë vit shkollor u ulën në banka për herë të parë 415 nxënës të klasave të para, numër ky 7 më pak se një vit më parë.
Në total, procesi arsimor përfshin 5,983 nxënës të të gjitha cikleve, të cilët i nisën mësimet sot në kushte të qeta dhe pa problematika. Për më tepër, është rritur edhe niveli i sigurisë pranë shkollave, falë shtimit të punonjësve të policisë dhe patrullave që monitorojnë mjediset shkollore.
