Kryetari i Bashkisë Korçë, Sotiraq Filo, priti në një takim zyrtar ambasadorin e Suedisë në Shqipëri, z. Niklas Ström.
Gjatë vizitës u diskutua gjerësisht mbi mundësitë reale për zhvillimin e ekonomisë lokale dhe avancimin e mëtejshëm të turizmit në qytetin e Korçës. Ambasadori Ström shprehu interesin e disa kompanive të rëndësishme suedeze për të investuar në vendin tonë, duke vlerësuar potencialin që Korça ofron në drejtim të zhvillimit të qëndrueshëm dhe inovativ.
Kryetari Filo theksoi se Korça është një qytet që transformohet çdo ditë dhe është i gatshëm të mirëpresë investime serioze, duke parë këto iniciativa si mundësi të reja, por edhe sfida që shtyjnë drejt progresit me vizion dhe vendosmëri.
Takimi u mbyll me dakordësinë për të vazhduar bashkëpunimin, duke synuar konkretizimin e projekteve që do të kontribuojnë në zhvillimin ekonomik dhe social të qytetit.
