Më shumë se 40 artistë të penelit nga Shqipëria, Kosova, Mali i Zi dhe Maqedonia e Veriut janë bërë pjesë e kolonisë kolonjare në një prej zonave më turistike të kësaj krahine.
Të gjithë piktorët janë tërhequr nga ngjyrat e forta të vjeshtës leskoviqare duke u përqendruar vetëm tek peizazhi. Edhe vjeshta e këtij viti ka sjellë në këtë koloni piktorë që kanë qenë edhe herët e tjera, ashtu siç ka pasur piktorë që vinin për herë të parë, të cilët në qoftë se një vit më parë kans hedhur në talejo ngjyrat e vjeshtës në kushte të tjera atmosferike, në koloninë e këtij viti kanë qenë të detyruar të punojnë pa praninë e rrezeve të diellit pasi moti ka qenë jo fort i favorshëm në punimet e tyre.
“Vjeshta gjithmonë është e bukur. Nuk po na prin shumë sepse ka shi, por edhe me shi prap ngjyrat janë të bukura, natyre me format nga më të ndryshmet. Këtu bëhet kolonia e 4 në Ersekë, për mua është e para, erdha me shume kënaqësi. Është vend i bukur, me gjithë këto male, pyje, me atë Gramoz. Peizazh është puna ime” – tha Buron Kaceli
“Është natyra me e bukur që mund të gjendet, kjo është e veçantë. Unë e kam dobësi se kam bërë shkollën në Korçë dhe këtë rrugë me ka shoqëruar gjithmonë. Piktura është peizazh, i bukur, sidomos në vjeshtë” – tha Arben Kristan.
“Është viti i tretë që marr pjesë në Kolonjë, që marr pjesë në këtë koloni. Vërtet këtë herë është diçka ndryshe nga herët e tjera, me pare koha ka qenë shumë e bukur me diell por me bukur qenka e vrenjtur me shi. Kemi kapur kënde të ndryshe por besoj do dalin piktura të bukura me këtë gjendje që kemi sot”– u shprej Kastriot Laraku.
“Për mua është viti i 4 që vij. Po punoj një peizazh nga Barmashi, vjeshtë. Vij gjithmonë me kënaqësi dhe këtu kemi bërë punë të bukura, jemi shumë të kënaqur. Natyra është shumë e bukur”- ka thënë Petrit Laraku.
Për organizatorin Fatmir Toçi tashmë kolonia kolonjare është kthyer në një traditë, ndaj e për këtë tërheq vëmendjen e piktorëve shqiptare edhe përtej kufijve.
“Kemi arritur një moment që kjo po bëhet traditë që vjeshta për piktorët në radhë të parë është në Kolonjë pastaj në vende të tjera, dhe frymëzimi i tyre duket nga puna e tyre. Këta janë bërë promotorë për të themeluar një galeri arti në Ersekë, duke dhënë kontributin e tyre, vizitorët e shohin në art këtë zonë, është promocion i fuqishëm turistik”
Punimet e piktorëve të trevave shqiptare do të ekspozohen në sheshin “Rilindja” të qytetit të Ersekës
