Maliqi vishet me art! Nga data 6 deri më 9 nëntor 2025, Bashkia Maliq, nëpërmjet Drejtorisë së Trashëgimisë Kulturore, Turizmit dhe Arteve, organizon edicionin e pestë të kolonisë së piktorëve “Vjeshtë në Maliq”, një aktivitet tashmë tradicional që ka si qëllim të promovojë artin, natyrën dhe turizmin vendas.
Gjatë katër ditëve, piktorë nga e gjithë Shqipëria do të përjetësojnë në telajo pamjet më frymëzuese të zonës — Pyllin e Fazanëve, Luginën e Lumit Devoll dhe peizazhet karakteristike të bashkisë Maliq, të veshura me ngjyrat e arta të vjeshtës.
Kulmi i aktivitetit do të shënohet më 9 nëntor, ora 14:00, me hapjen e ekspozitës përmbyllëse në sheshin para Bashkisë Maliq, ku do të ekspozohen punimet e realizuara gjatë ditëve të kolonisë.
Ky edicion i pestë vjen si një urë e bukur bashkëpunimi mes artistëve dhe natyrës, duke e kthyer Maliqin në një qendër të gjallë të krijimtarisë dhe kulturës, në ditët më poetike të vjeshtës.
