Me dy ndeshje të zhvilluara të shtunën është mbyllur java e katërt në Superligën e volejbollit të femrave.
Një javë që nisi me një minutë heshtje në të gjitha takimet në nderim të trajnerit legjendar Vangjel Koja, i ndarë nga jeta disa ditë më parë. Skënderbeu regjistroi fitoren e radhës, duke kaluar me sukses transfertën e “Asllan Rusit” kundër Barletit. Vajzat e Orlando Kojës dominuan në çdo aspekt ndaj universitareve, teksa triumfuan 0-3 në një përballje që zgjati 77 minuta.
Në të tria setet, epërsia e skuadrës korçare ishte e dukshme, e përkthyer edhe në rezultat, me miket që fituan përkatësisht 14-25, 18-25 dhe 17-25. Elena Bego me 16 pikë, Caroline Moreria me 12 dhe Elizabeth Sandoval me 10 spikatën në sulmin e kampioneve në fuqi, me Skënderbeun që shkëlqeu edhe në mbrojtje, duke mos çuar asnjë lojtare të Barletit në kuotë dyshifrore pikësh.
Në Farkë u zhvillua derbi i kryeqytetit ndërmjet Dinamos dhe Tiranës, sfidë që vendoste përballë dy ekipet më të titulluara të volejbollit të femrave në Shqipëri, 20 herë kampione secila. Vajzat bardheblu të trajnerit Adrian Gorenca triumfuan 0-3 në një takim që zgjati 1 orë e 31 minuta. Tirana e nisi lojën mirë, duke komanduar në çastet e para, por Dinamo u afrua dhe vendosi baraspeshën 17-17. Megjithatë në momentet vendimtare, skuadra bardheblu rikaloi përpara, për ta fituar setin e parë 22-25.
I ngjashëm ishte edhe seti e dytë, i mbyllur 19-25 për Tiranën. Edhe në setin e tretë vajzat bardheblu ishin gjatë të gjithë kohës në epërsi dhe me gjithë përpjekjet në fund nga Dinamo, Tirana fitoi 23-25. Enkeleda Braho ishte lojtarja e ndeshjes, me 20 pikë për Tiranën, ndërsa venezuelasja Johenlis Belisario, u prezantua me 14 pikë në debutimin me bardheblutë.
Në takimet e luajtura të premten, Partizani mundi 0-3 Vllazninë, ndërsa Teuta triumfoi 1- 3 ndaj Pogradecit.
