Nga Korça vjen një nismë e veçantë për arsimin gjithëpërfshirës. Mësuesja ndihmëse Xhensila Kokoshi, me mbi 10 vite përvojë në këtë fushë, ka përgatitur fletoren e parë didaktike të dedikuar posaçërisht për fëmijët me nevoja të veçanta, me titull “Unë dhe mjedisi rreth meje”.
E konceptuar për fëmijët e moshës 6 deri në 14 vjeç, fletorja synon t’u ofrojë njohuri bazike mbi jetën e përditshme, t’i ndihmojë të zhvillojnë aftësitë në të folur dhe në të shkruar me metoda argëtuese, si dhe të lidhë njohuritë rreth mjedisit me zhvillimin gjuhësor. Përmbajtja e saj përfshin tema praktike si njohja e vetes, higjiena personale, ushqimi i shëndetshëm, stinët dhe orientimi në hapësirë.
Ky botim përfaqëson një hap të rëndësishëm në mbështetje të arsimit gjithëpërfshirës, duke i pajisur mësuesit, prindërit dhe vetë fëmijët me një mjet të vlefshëm për zhvillimin e aftësive bazike dhe integrimin më të mirë në shoqëri.
