Burime të sigurta pranë grupit të hetimit bëjnë me dije se prej gjashtë muajsh, personat e arrestuar në kuadër të operacionit “Matrikulli”, por edhe të tjerë, kanë qenë nën hetim për kontrabandimin e bagëtive, kryesisht gjedhë dhe të imta. Këto bagëti futeshin ilegalisht nga Greqia përmes kufirit të gjelbër dhe më pas transportoheshin drejt zonës së Devollit, ku matrikulloheshin në mënyrë të paligjshme dhe hidheshin në treg si të rregullta.
Hetimet kanë zbuluar se jo vetëm që këto bagëti janë matrikulluar, por një pjesë e tyre janë therur dhe më pas janë tregtuar e konsumuar nga qytetarë të ndryshëm, pa dijeninë se kishin të bënin me produkte të kontrabanduara dhe potencialisht të rrezikshme për shëndetin.
I njëjti burim shton se hetimi po zgjerohet edhe në drejtim të institucioneve shtetërore përgjegjëse, pasi ekzistojnë dyshime të forta për bashkëpunim apo neglizhencë nga zyrtarë të caktuar. Madje, hetuesit kanë zbuluar lidhje konkrete mes autorëve të kontrabandës dhe personave të tjerë tashmë të arrestuar në kuadër të rasteve të mëparshme.
Për shkak të kontrabandimit të bagëtive nga territori grek, janë evidentuar raste me murtajë të bagëtive në disa fshatra të Devollit, çka e bën këtë situatë edhe më alarmante dhe të rrezikshme, jo vetëm për sektorin blegtoral, por edhe për sigurinë ushqimore të qytetarëve.
