Zeni Çela, futbollisti polivalent që i fali gjithçka sportit korçar sot feston 88 vjetorin me dashurinë e jetës së tij Klara Çela.
Ikonat e futbollit korçar, ata që me lojën e tyre i kanë dhuruar emocione të pa përsëritshme sportdashësve të këtij qyteti, janë si perlat e rralla në një gjerdan të bukur. Një ndër ta, mjeshtri i topit të këmbës Zeni Çela, është ai që i ka falur gjithçka të pasionit e mundit të tij vetëm futbollit korçar.
Sot Zeni Çela feston 88 vjetorin e tij të lindjes, ndërsa meriton të kurohet me nderim, edhe për faktin se kontributi i tij si lojtar dhe trajner në futbollin korçar nuk është çmuar sa duhet. Kjo edhe për shkak të biografisë dikur, dhe sot i lënë disi në harresë, teksa i përkushtohet jetës familjare me bashkëshorten e tij, punonjësen emblemë të bibliotekës së Korçës, intelektuale dhe veprimtaren shoqërore Klara Çela.
I vëmendshëm këtë mëngjes të 11 tetorit që kremton 88 vjetorin e lindjes më tepër për bashkëshorten sesa për datën e shënuar të jetës, profesor Zeni i kujton se e kanë kërkuar në telefon.
Klara thotë se ka qënë i pari djali i tyre që i ka uruar ditëlindjen të atit, dhe padyshim nuk ka munguar vajza e gjatë ditës do të marrin shumë urime nga miqtë e tyre dhe dashamirësit e profesor Zenit.
‘Do ta festojmë këtë 88 vjetor të Zenit të dy në shtëpinë tonë, se unë jam pak pa qejf nga shëndeti dhe ai e ka shumë merak të kujdeset për mua. Edhe pse me diferencë moshe nga unë mbahet mjaft mirë me shëndet’ thotë Klara.
Dhe kështu ndodh. Edhe tani në moshën 88 vjeçare Zeni Çela ruan një formë të mirë sportive, duke mos u ndarë nga pasioni i tij i pleqërisë, pedalimi i biçikletës. Njëherë që ndodhi ta humbë u ndie disi keq dhe familjarët u detyruan t’ja zvendësonin me një të re.
Sot është 88 vjeç, e mban mbi supe një karrierë të gjatë e të suksesshme futbollistike si lojtar dhe trajner. Zeni Çela është korçari i mirënjohur, mjeshtri i topit që ka luajtur në pozicione të ndryshme duke i qëndruar besnik vetëm Skënderbeut.
Një nga figurat më të shquara që qyteti i Korçës ka patur fatin ta ketë jo vetëm si qytetar, por edhe si profesionist të sportit të futbollit.
Zeni Çela përfundoi karrierën si futbollist në vitin 1967, por nuk hoqi dorë nga pasioni i tij për futbollin, duke vazhduar më pas si trajner i ekipit të moshave, dhe po ashtu si mësues pranë shkollës Stavri Themeli. E një ndër arritjet e profesor Çelës ka qenë formimi i një ekipi privat të cilin e quajti Oktapodi, duke dalë 10 vite kampion, e duke i dhënë Korçës një tjetër ekip me vlerë në atë kohë.
Pofesor Zeni Çela ka dhënë shumë në trajnimin e të rinjve dhe nxjerrjen e talenteve korçarë, që sot e kësaj dite luajnë në ekipe të mëdha në Shqipëri apo edhe në Europë.
