Një mbrëmje e mbushur me emocion dhe kujtime solli në skenën e Teatrit “Andon Zako Çajupi” në Korçë projektin “Zërat e Artit – një karavan nëpër Shqipëri”, organizuar nga AWA dhe mbështetur nga Ministria e Ekonomisë, Kulturës dhe Inovacionit. Artistë të njohur të skenës shqiptare ndanë me publikun korçar rrëfime personale nga rrugëtimi i tyre artistik, aty ku gjithçka kishte nisur: në qytetin e kulturës, Korçë.
Josif Minga, Zamira Kita, Koço Qendro, Llazi Balashi, Ilda Pepi, Blerta Belliu dhe Ylli Trajçe emocionuan sallën me fjalën e tyre të drejtpërdrejtë, pa interpretim e pa skenar, duke sjellë histori formimi, pasioni dhe përkushtimi ndaj artit dhe publikut. Publiku ndoqi me interes dhe duartrokitje këtë aktivitet që solli përballë tyre njeriun pas figurës artistike.
Mbrëmja ishte një dëshmi e fuqisë së kujtesës kulturore dhe një homazh për ata që kanë ndërtuar me përkushtim një trashëgimi të pasur artistike në skenën shqiptare.
