Situata e zjarreve në Gramsh është përkeqësuar ndjeshëm pasditen e së martës, duke detyruar autoritetet të urdhërojnë evakuimin e menjëhershëm të disa fshatrave. Banorët e Skënderbegasit, Gërmenjit, Harunasit dhe Zenelasit janë thirrur të largohen nga banesat për shkak të përhapjes së shpejtë të flakëve. Sipas raportimeve, Skënderbegasi është evakuuar plotësisht, ndërsa operacionet për zhvendosjen e banorëve nga fshatrat e tjerë vijojnë.
Ndërkohë, një njoftim zyrtar ka bërë të ditur se zjarri masiv në fshatin Kullollas është shkaktuar nga një 80-vjeçar, i cili ndezi zjarr në kopshtin e tij, por flakët dolën nga kontrolli. I moshuari humbi jetën si pasojë e asfiksimit, duke u bërë viktima e parë e zjarreve të këtij viti në vend.
Tymi i dendur është përhapur deri në afërsi të Cërrikut, ndërsa katër fshatra — Kullollas, Bletëz, Menkollar dhe Shimër — janë përfshirë nga flakët dhe kanë pësuar dëme të mëdha materiale. Forcat e emergjencës po punojnë për të vënë nën kontroll situatën dhe për të parandaluar përhapjen e mëtejshme të zjarreve.
