Drejtori i Përgjithshëm i Shërbimit Zjarrfikës, Arben Cara, zhvilloi sot një takim në Korçë me përgjegjësit e stacioneve zjarrfikëse të rajonit juglindor, ku në fokus të diskutimit ishin sfidat dhe problematikat me të cilat përballen strukturat në terren, veçanërisht në zonat malore.
Në një prononcim për mediat, Cara theksoi se vështirësitë më të mëdha nuk lidhen me pamjaftueshmërinë e mjeteve, por me mungesën e infrastrukturës rrugore në zonat e thella malore, një përgjegjësi që u takon bashkive.
“Nuk është çështje mjetesh, por rrugësh. Ligji e detyron kryetarin e bashkisë të sigurojë rrugë kalimi për zjarrfikëset. Ka bashki që kanë reaguar dhe kanë hapur rrugët e dhéut, por ka ende bashki që nuk kanë kryer investimet e nevojshme. Buxhetet janë shpesh të pamjaftueshme, por investimet duhen bërë hap pas hapi.”
Sa i përket ndërhyrjeve nga ajri, Cara sqaroi se Shqipëria ka kapacitete ajrore të mjaftueshme dhe se çdo rast vlerësohet me kujdes për të ndërhyrë sipas shkallës së rrezikut.
“Nuk ka pasur vonesa në ndërhyrje nga ajri, por ka pasur vlerësime të situatave për të ndërhyrë me prioritet. Në çdo rast, avionët kanë ardhur në ndihmë. Jemi në komunikim edhe me mekanizmin europian, pasi është normale të punojmë me mbështetje të ndërsjellë.”
Për vjetërsinë e mjeteve zjarrfikëse në juglindje, ai shtoi se nuk është viti i prodhimit ai që ka rëndësi, por funksionaliteti i tyre.
“Të gjitha mjetet janë në gjendje pune. Edhe në vende të zhvilluara si SHBA apo Çekia përdoren mjete të prodhimeve të ndryshme, por që janë të pajisura dhe funksionale. Edhe pse pajisjet nuk janë gjithmonë të reja, ato janë të përdorshme dhe efektive.”
Gjatë ditëve të fundit, në juglindje të vendit janë shfaqur disa vatra zjarri, përfshi në zonat e Vernikut, Drenovës, Leminotit dhe Kapshticës.
