Korça ka përkujtuar sot 81-vjetorin e Çlirimit, një nga datat më të rëndësishme në historinë e saj. Në sheshin përpara Teatrit “Andon Zako Çajupi” u zhvillua ceremonia solemne, ku morën pjesë veteranë të luftës, familjarë të dëshmorëve, si dhe përfaqësues të pushtetit lokal e qëndror.
Aktiviteti nisi me interpretimin e bandës frymore të qytetit, ndërsa në fjalët përshëndetëse u theksua rëndësia e kësaj dite që simbolizon sakrificën dhe përkushtimin për liri. Të pranishmit shprehën mirënjohjen për ata që dhanë jetën për atdheun.
Ceremonia u mbyll me një koncert festiv, që solli atmosferë patriotike dhe krenari për qytetin që ngriti flamurin e lirisë më 24 tetor 1944.
