Drejtuesi politik i qarkut të Korçës, Niko Peleshi, ka shpërndarë një video frymëzuese në rrjetet sociale, ku të rinj nga e gjithë Europa shpallin me krenari: “Ne jemi Europa”. Me simbolikën e fortë të bashkimit dhe identitetit europian, Peleshi thekson se ky mesazh i thjeshtë vizual mbart një domethënie të thellë për të ardhmen e Shqipërisë.
“Me pastërtinë e shpirtit dhe dritën e syve që vetëm rinia mund të ketë, këta ambasadorë të së nesërmes artikulojnë qartë atë që shpesh e ngatërrojmë në labirintet e politikës”, shkruan Peleshi.
Ai shton se për të rinjtë, Europa nuk është një horizont i largët, por shtëpia e përbashkët ku ndihen të përfshirë. Sipas tij, tashmë është radha e Shqipërisë për të hyrë në këtë shtëpi të përbashkët europiane.
“#Shqipëria2030 në Europë nuk është thjesht një ëndërr e shkruar në letër, është betimi ynë solemn ndaj gjeneratës që do të trashëgojë nesër frytet e punës sonë sot”, mbyll reagimin e tij ministri.
