Gjykata e Barit ka konfirmuar arrestimin dhe ka lënë në burg 42-vjeçarin shqiptar Elvis Metvelaj, i cili akuzohet nga autoritetet italiane për vrasjen e partneres së tij, Ornella Forastefano, 46 vjeçe.
Ngjarja e rëndë ka ndodhur në orët e para të mëngjesit të 16 gushtit, rreth orës 03:00, kur 46-vjeçarja u dërgua pranë hyrjes së spitalit të Trebisacce-s në rajonin e Kalabrisë, me trauma të rënda dhe plagë të thella në të gjithë trupin. Ekipi mjekësor i urgjencës u përpoq t’i shpëtonte jetën, por dëmtimet e marra rezultuan fatale për të.
Përpjekja për arratisje dhe hetimet e prokurorisë
Dyshimet e karabinierëve u përqendruan menjëherë te partneri i saj shqiptar, i cili ishte larguar nga vendngjarja. Hetuesit rindërtuan lëvizjet e të dyshuarit dhe e lokalizuan atë në qytetin portual të Barit, ku u arrestua teksa po përpiqej të hipte në traget për t’u kthyer në Shqipëri. I dyshuari e ka mohuar krimin gjatë marrjes në pyetje, ndërsa dosja hetimore i është kaluar Prokurorisë së Castrovillarit.
Sipas të dhënave të publikuara nga rrjeti mediatik RAI, 42-vjeçari dhe viktima kishin rreth 1 vit që bashkëjetonin. Ornella Forastefano drejtonte një bar në qendër të Trebisacce-s së bashku me dy djemtë e saj. Viktima ishte motra e Domenico Forastefanos, i cilësuar nga mediat si eksponent i klanit ‘Ndrangheta, ndërsa babai i saj Antonio Forastefano ishte vrarë në vitin 1999. Megjithatë, Prokuroria e Castrovillarit ka bërë me dije se deri tani nuk ka elemente që e lidhin ngjarjen me të kaluarën familjare dhe po hetohen të gjitha pistat e mundshme.
E kaluara e të dyshuarit dhe precedentët penalë
Elvis Metvelaj rezulton person i njohur për forcat e rendit në Itali për precedentë penalë në fushën e lëndëve narkotike. Emri i tij kishte dalë më parë në një hetim të bujshëm të vitit 2013 për trafik ndërkombëtar droge në Kalabri, ku u përfshi edhe këngëtarja Liljana Kondakçi. Në atë dosje me rreth 20 persona të dyshuar, ai njihej me nofkën “majmuni”, kurse këngëtarja u dënua më pas me 2 vjet e 8 muaj burg. Megjithëse kanë kaluar më shumë se 13 vite nga ajo dosje, emri i Metvelajt është rikthyer në vëmendjen e drejtësisë italiane nën akuzën e rëndë të vrasjes.
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë.
