Një foshnjë e pajetë dhe e ngrirë është gjetur nga policia greke brenda një ene në një valixhe, në zonën Kypseli të Athinës, pas një denoncimi të bërë nga pronari i një banese të dhënë me qira.
Zbulimi pas denoncimit të pronarit të banesës
Ngjarja u zbulua pasi pronari i një apartamenti në rrugën Thasou njoftoi forcat e rendit se personat që kishin marrë ambientin refuzonin të largoheshin dhe nuk kishin paguar detyrimet, ndërsa ngriti dyshime edhe për përdorim të lëndëve narkotike brenda banesës. Sipas mediave greke, pranë zonës kaluan efektivë të skuadrës DIAS me motorë, të cilët u ndaluan nga pronari dhe u shoqëruan drejt apartamentit për verifikim.
Personat e pranishëm dhe dëshmitë
Në banesë ndodheshin burri me origjinë greke që kishte marrë me qira apartamentin, bashkëshortja e tij, vajza e tij 15-vjeçare, një shtetas afgan dhe dy fëmijë të mitur. Policët morën nga banesa dy valixhe dhe i transportuan në komisariat për kontroll, ku brenda njërës prej tyre gjetën një enë me trupin e pajetë të foshnjës.
Gjatë marrjes në pyetje nga policia, gruaja gjermane pretendoi se foshnja ishte e saj dhe se e kishte humbur tetë muaj më parë. Sipas informacioneve të raportuara nga mediat vendase, vajza 15-vjeçare e pranishme në banesë është shtatzënë, ndërsa autoritetet po vijojnë hetimet për të sqaruar të gjitha rrethanat e ngjarjes.
