Një aksident i rëndë ka ndodhur mesditën e sotme në aksin nacional Korçë–Bilisht, në kryqëzimin midis fshatrave Progër dhe Mançurisht, ku ka humbur jetën një 79-vjeçar dhe është plagosur drejtuesi i automjetit që shkaktoi përplasjen.
Viktima është identifikuar si Haki Rusi, banor i fshatit Mançurisht. Sipas burimeve nga vendngjarja, i moshuari po kthehej nga Bilishti me një mjet të shërbimit publik dhe ishte ndalur së bashku me bashkëfshatarë të tjerë në pikën ku ndodhi më pas aksidenti.
Pasi ka zbritur nga furgoni, 79-vjeçari ka tentuar të kalojë në anën tjetër të rrugës, aty ku kishte lënë biçikletën e tij. Në momentin e kalimit, ai është goditur me forcë nga një automjet tip “Benz”, duke ndërruar jetë në vend, pasi trupi i tij përfundoi nën një tjetër mjet të parkuar pranë kryqëzimit.
Burime të besueshme bëjnë me dije se drejtuesi i “Benz”-it po lëvizte me shpejtësi shumë më të lartë se kufiri i lejuar. Përplasja ka qenë aq e fortë, sa automjeti ka vijuar lëvizjen për më shumë se 30 metra, duke përfunduar në kanalin anësor të rrugës.
Policia ka nisur hetimet për të zbardhur rrethanat e plota të ngjarjes, ndërsa drejtuesi i mjetit është dërguar në spital me plagë.
Aksi Bilisht–Plasë njihet prej vitesh si një zonë problematike, me kryqëzime të shumta ku kanë ndodhur aksidente tragjike me pasoja të rënda në jetë njerëzish.
