Në mjediset e Prefekturës së Qarkut Korçë u zhvillua takimi i pestë i Komitetit Pilotues për projektin e çeljes së Liceut Francez në këtë qytet. Të pranishëm në këtë aktivitet ishin ambasadorja e Republikës së Francës në Shqipëri, Catherine Suard, këshilltari për Bashkëpunimin dhe Kulturën në Ambasadën Franceze, Pierre Raynaud, si edhe eksperti i qeverisë franceze, Jérôme Lebars, i cili është i atashuar pranë Prefekturës së Korçës për të ndjekur nga afër projektin.
Ky projekt synon të forcojë lidhjet kulturore dhe arsimore mes Shqipërisë dhe Francës, duke sjellë një mundësi të re arsimore për të rinjtë e qarkut të Korçës dhe më gjerë. Pas përfundimit të studimeve në këtë lice, nxënësit do të kenë mundësinë të ndjekin shkollime të mëtejshme në institucione elitare.
Ecuria e projektit pritet të prezantohet edhe në takimin e Komunitetit Politik Evropian që do të zhvillohet më 16 maj në Tiranë, ku do të marrin pjesë liderë evropianë, përfshirë kryeministrin Edi Rama dhe presidentin francez Emmanuel Macron.
Liceu Francez i Korçës përfaqëson një hap të rëndësishëm në thellimin e marrëdhënieve shqiptaro-franceze dhe në krijimin e një platforme cilësore arsimore për brezat e ardhshëm.
