Ndërhyrjet në kanalet kulluese e vaditëse si dhe te kolektorët kryesorë po bëhen në gjithë vendin, veçanërisht në zonat me potencial të lartë bujqësor.
Ministrja e Bujqësisë dhe Zhvillimit Rural, Anila Denaj ndau disa momente nga puna që po kryhet në kanalin ujitës nga rezervuar i Petrushës deri në Sovjan.
Së bashku me ministren ka qenë dhe Prefekti i Korçës, Nertil Jole si dhe kryetari i bashkisë Maliq, Gëzim Topçiu. Ai shprehet se ky investim i duhej fushës së Maliqit dhe fermerëve.
“Është një zonë e cila ka patur vështirësi në ujitjen e tokave bujqësore. Që nga vitet ’90 dhe këte ka qenë jashtë funksionit, tani është ndërhyrja e parë në këtë objekt. Po e pastrojmë, do të rehabilitohet komplet gjatësia dhe do ta kthejmë në një objekt funksional për fermerët e kësaj zone. Është një investim shumë i rëndësishëm,”– ka thënë kryetari i bashkisë Gëzim Topçiu.
“Rreth 500 ha tokë bujqësore do të hyjë në sistemin e ujitjes. Kemi vrapuar që të mbarojë shumë shpejt e gjitha kjo punë. Projekti ka një afat tre mujor por besojmë se do të mbarojë më herët. Kështu do të jemi gati dhe për investime të tjera“- përfundoi ai.
Ndërkohë dhe ministrja Denaj është shprehur shumë e gatshme për bashkëpunim.
“Është një mbështeje që qeveria ja jep bashkisë, për t’u ardhur në ndihmë gjithë fermerëve. Në qarkun e Korçës janë 4 bashki që e kanë marrë këtë mbështetje dhe jam shumë e gatshme që për bashkinë e Maliqit të shtoj këtë mbështetje sepse është një ndihmë për gjithë fermerët e kësaj zone që punojnë çdo ditë që asnjë sipërfaqe mos jetë e pakultivuar.
Edhe nevoja që vijnë në nivel prefekture jemi shumë të gatshëm t’i marrim parasysh sepse është një zonë bujqësore që e ka të domosdoshme ndërhyrjen dhe në nivel të pushtetit lokal”– u shpreh Anila Denaj.
