Për herë të parë, Këshilli i Qarkut Korçë organizoi festivalin unik “Autonom Fest”, një aktivitet që mblodhi në një skenë të vetme të gjitha grupet folklorike të rajonit të Juglindjes. Ky festival synon të pasurojë dhe promovojë trashëgiminë e pasur kulturore të kësaj treve, duke nxjerrë në pah muzikën, vallet dhe traditat popullore të zonës.
Një nga momentet më emocionuese të festivalit ishte paraqitja e Myftar Bogdanit, 64 vjeç, dhe Besmir Tropollarit, 27 vjeç, nga Pogradeci. Ata befasuan publikun me meloditë baritore, të cilat, sipas tyre, kanë një histori mbi 100-vjeçare. Tingujt e tyre të veçantë ngjallën nostalgji dhe emocion te të pranishmit.
I pranishëm në festival ishte edhe klarinetisti i njohur Aleks Xhelili, i cili vlerësoi iniciativën dhe theksoi rëndësinë e ngjarjeve të tilla. “Festivale si ky sjellin në skenë pjesë të padegjuara më parë nga gurra popullore,” – tha Xhelili, duke nënvizuar rëndësinë e ruajtjes dhe promovimit të muzikës autoktone.
Ndërsa këngëtari i njohur i Devollit, Endri Fifo, veçoi rolin e të rinjve në këtë festival. “Është shumë e rëndësishme angazhimi i të rinjve me muzikën folklorike,” – u shpreh ai, duke e konsideruar festivalin një mundësi të shkëlqyer për të nxitur brezin e ri të njohë dhe të çmojë traditën muzikore të trevës.
“Autonom Fest” pritet të kthehet në një traditë vjetore, duke shërbyer si një urë lidhëse mes brezave dhe si një skenë për të risjellë në vëmendje perlat e harruara të muzikës popullore shqiptare.
