Biblioteka “Thimi Mitko” në Korçë është pasuruar me 100 tituj të rinj nga botimet akademike të 20 viteve të fundit, të dhuruara nga Instituti Shqiptar i Studimeve Ndërkombëtare. Këto botime, që përfshijnë fusha të ndryshme të marrëdhënieve ndërkombëtare dhe historisë, do të vihen në dispozicion të studiuesve, studentëve dhe komunitetit korçar.
Albert Rakipi nga Instituti Shqiptar i Studimeve Ndërkombëtare theksoi se këto libra janë pjesë e fondit të bibliotekës së marrëdhënieve ndërkombëtare që Instituti ka themeluar prej dy dekadash dhe tashmë do të kontribuojnë në zgjerimin e literaturës së bibliotekës “Thimi Mitko”.
Ndërkohë, Jorida Tollkuçi, drejtoresha e bibliotekës “Thimi Mitko”, u shpreh se kjo dhuratë do t’i shërbejë shumë komunitetit të studiuesve dhe studentëve në Korçë, duke ofruar burime të rëndësishme për kërkime dhe studime në fushën e marrëdhënieve ndërkombëtare dhe historisë.
