Një ndeshje miqësore mes Elbasanit dhe Pogradecit, që duhej të ishte një test sportiv dhe shembull respekti, përfundoi në një incident të rëndë dhune që tronditi ambientin sportiv.
Pas barazimit 2-2, tensionet nisën me një debat mes futbollistëve të të dy ekipeve, por brenda pak çastesh situata doli jashtë kontrollit dhe u shndërrua në një përplasje fizike masive.
Ajo që pasoi ishte edhe më e rëndë: anëtarë të stafit dhe tifozë të Elbasanit u futën në fushë dhe goditën lojtarët e Pogradecit me grushte dhe shkelma, në një akt të dhunshëm që nuk ka asnjë lidhje me sportin. Disa prej tyre përdorën edhe lëvizje agresive në stil martial, duke e kthyer fushën në një arenë përplasjeje, jo gare.
Ngjarja rikthen në vëmendje një tjetër episod të ngjashëm që ndodhi po në Elbasan, tre vite më parë, kur Pogradeci u sulmua si në fushë, ashtu edhe jashtë saj. Ky përsëritje e ngjarjeve tregon një problem të thellë që kërkon reagim urgjent.
Tani pritet që Federata Shqiptare e Futbollit të ndërhyjë me vendosmëri, për të dhënë një mesazh të qartë: dhuna nuk tolerohet! Futbolli duhet të bashkojë, jo të përçajë – dhe për ngjarje të tilla nuk ka më justifikim.
