Klubi i Futbollit Devolli ka zyrtarizuar emërimin e trajnerit të ri për sezonin 2025/26, duke ia besuar pankinën teknikut Erindi Maneshi. Kontrata është firmosur dhe Maneshi është prezantuar zyrtarisht si pjesë e projektit të ri të skuadrës nga Bilishti.
Lajmi u konfirmua nga drejtuesit e klubit, ndërsa ekzekutivi Ermir Lukara sqaroi objektivat e sezonit:
“Kemi nisur nga trajneri sepse ai është baza mbi të cilën ndërtohet skuadra. Jemi të bindur se Maneshi do të udhëheqë Devollin drejt qëllimit tonë të qartë – ngjitjes në Kategorinë e Parë. Grupi aktual është ruajtur në pjesën më të madhe dhe do të ndërtojmë mbi këtë strukturë.”
Me emërimin e trajnerit të ri, Devolli hap një kapitull të ri në rrugëtimin e tij drejt rikthimit në elitën e futbollit shqiptar. Maneshi do të fillojë menjëherë punën me fazën përgatitore, ndërkohë që në ditët në vijim priten lëvizje të para në merkato, si në hyrje ashtu edhe në dalje.
Klubi nga Devolli synon një sezon të konsoliduar dhe konkurrues, me objektiva të qarta sportive dhe organizative.
