Fermerët që kultivojnë pataten kanë nisur trajtimin me herbicide për të luftuar barërat e këqija që janë shtuar pas reshjeve të fundit. Lagështira në tokë ka krijuar kushte të përshtatshme për shfaqjen masive të tyre, duke rrezikuar zhvillimin normal të bimëve dhe prodhimin final.
Fermerja Luljeta Shaholli tregon se ndërhyrja me herbicide është e domosdoshme në këtë fazë të hershme të kulturës së patates, për të shmangur konkurrencën e barërave të këqija me bimën kryesore.
“Pas shirave të fundit, barërat janë shtuar dhe është e nevojshme që të luftohen në kohë, përndryshe dëmtojnë rendimentin”, u shpreh ajo.
Ndërkohë, lagështia në tokë ka favorizuar mbirjen e patates. Sipas Shahollit, është mbjellë një kultivar për të cilin ka kërkesë në treg dhe që përshtatet me kushtet agroklimatike të zonës.
“Çdo vit përzgjedhim varietete që japin rendiment të lartë dhe janë të qëndrueshme ndaj kushteve të ndryshme atmosferike. Kjo na ndihmon që të kemi një prodhim cilësor dhe të kërkuar në treg”, shton ajo.
Fermerët po ndjekin me kujdes fazat e hershme të rritjes së patates, në mënyrë që të sigurojnë një prodhim të mbarë dhe fitimprurës në përfundim të sezonit.
