Për të 17-in vit radhazi “Festa e Birrës” në Korçë do të mbledhë edhe këtë herë, në datat 16-21 gusht vizitorë nga i gjithë vendi, por jo vetëm.
Ky është eventi më i madh në Shqipëri dhe gjatë pesë ditëve, pritet që qyteti të vizitohet nga mbi 100,000 njerëz, jo vetëm për të provuar birrën dhe për të dëgjuar muzikë të mirë, por edhe për t’u njohur me traditat e qytetit juglindor si një qendër e kulturës, arsimit, serenatave, karnavaleve, etj.
Mbi 500 artistë të mirënjohur nga Korça, vendi dhe përtej kufijve kanë performuar në gjithë këto vite në këtë event.
Ky qytet mirëpret të gjithë ata qe e duan natyrën e bukur, ofruar kjo nga mjaft zona përreth qytetit. Një program i mirëmenduar aktivitetesh kulturore, ndërthurur edhe me atraksionet e tjera të qytetit dhe fshatrave të kthyera tashmë në një destinacion të përhershëm, rikthejnë prej shumë vitesh dashamirës të shumtë.
“Festa e Birrës”, e shndërruar në një festë të bukur verore, ka arritur që ta shënojë Korçën si pikë chekin-i të preferuar gjatë sezonit veror. Larg temperaturave të larta të Tiranës, apo bregdetit shumë vizitorë e zgjedhin Korçën për freskinë, për shkak të pozicionit të saj gjeografik.
Përtej birrës, kjo festë është gjithashtu një mundësi për të gjithë turistët që të ndalojnë në disa atraksione kryesore të qytetit, që nis me arkitekturën madhështore të Katedrales Ortodokse, më e madhja në Shqipëri dhe e dyta në Ballkan. Pazari i Vjetër, shtëpitë karakteristike, veçanërisht në zonën pas Katedrales Ortodokse, rrugët me kalldrëm, të gjitha me një bukuri tërheqëse.
Prej pak vitesh tashmë festa do të organizohet edhe këtë herë në Terminalin e Autobusëve me një infrastrukturë të kuruar në detaje për organizime të përmasave të mëdha.
“Festa e Birrës”, një festival që u themelua në vitin 2007 është kthyer vit pas viti në një organizim unik, që edhe këtë vit synon të sjellë 5 ditë të mrekullueshme për ata që e kanë zgjedhur si destinacion të këtij mesgushti.
