Departamenti i Garave në Federatën Shqiptare të Futbollit organizoi këtë të premte një mbledhje me Drejtorët Sportivë të 10 klubeve të kampionatit ‘Abissnet Superiore’.
Fokusi i kësaj mbledhjeje ishin propozimet mbi ndryshimin e mundshëm të formatit të ‘Abissnet Superiore’.
Federata Shqiptare e Futbollit, në një njoftim zyrtar bën me dije se po diskutohen 4 opsione për ndryshimin e formatit të Superiores, me qëllim rritjen e nivelit të garës dhe shikueshmërisë.
Ditën e nesërme pritet që Presidenti i Federatës Shqiptare të Futbollit, Armand Duka të presë në ambientet e ‘Shtëpisë së Futbollit’ 10 Presidentët e klubeve të kampionatit, për të diskutuar propozimet.
“Për të rritur më shumë nivelin e garës, shikueshmërinë, të ardhurat nga të drejtat televizive e marketing, si dhe për ta bërë kampionatin sa më tërheqës dhe interesant, Federata Shqiptare e Futbollit u ka kërkuar disa javë më parë Departamentit të Garave në UEFA të sjellë disa propozime se si kampionati ‘Abissnet Superiore’ mund të ndryshojë në vijim.Përfaqësuesit e këtij Departamenti në UEFA kanë sjellë 4 opsione të ndryshme, me disa variante për secilin propozim. Ky material është analizuar nga specialistë në FSHF dhe u është vënë fillimisht në tavolinë Drejtorëve Sportivë të klubeve të ‘Abissnet Superiore’”, njofton FSHF.
