Dy javët e fundit duket se do të jenë më shumë se të luftuara për ekipet që kërkojnë një pozicion të qetë në pjesën e mbetur te sezonit. Barazimi me Tiranën në shtëpi duket se ka trazuar disi ujrat në kampin bardhekuq duke prishur llogaritë e fundsezonit. Kjo të paktën lexohet kështu në sytë e ish-sulmuesit korçar, Dhimitraq Xhambazi.
xhambazi
Në një prononcim të dhënë për “Panorama Sport”, ikona e sulmit korçar thekson se me një fitore ndaj Tiranës, Skënderbeu mund të quhej 90% i shpëtuar, por barazimi duket se ka komplikuar disi llogaritë dhe situatën e korçarëve në këtë fund sezoni.
“Barazimi i fundit në shtëpi, duket se nuk ishte rezultati më i mirë për ne, pasi një fitore do të na bënte shumë punë dhe do të lehtësonte fundin e sezonit përsa i përket mbijetesës. Por tashmë me këtë rezultat duke i bashkuar me ndeshjet e tjera të javës që lamë pas, mendoj se është jo aq negativ por le vend për pengje. Me një fitore do të ishim më të qetë. Tani na duhet që të marrim të paktën katër pikë në dy ndeshjet e fundit, pasi situata është komplekse dhe gjithçka, përfshi edhe llogaritë, mund të ndryshojnë në varësi të rezultateve nga java në javë.
Përtej këtyre sa thashë, besimi është i madh, pasi ekipi po bën ndeshje të mira dhe paraqitje pozitive. Kjo të lë të mendosh se nuk do të jetë e vështirë që në dy ndeshjet e radhës të arrijmë matematikisht mbijetesën, pa dashur të kalojmë përmes ‘play out’-it”, theksoi fillimisht Xhambazi.
SEZONI – I ndalur më pas te kalendari në këtë fund sezoni, ish-sulmuesi korçar bëri apel që ekipi të mos jetë i përqendruar te pikët e nevojshme, por te ndeshja e radhës. “Me një llogari të thjeshtë, është e drejtë që me katër pikë ekipi shmang rënien dhe ‘play out’-in. Por në këto momente duhet të jemi të përqendruar te ndeshja e radhës. Le t’i marrim një e nga një ndeshjet e këtij fundsezoni dhe të shohim se çfarë mund të bëjmë pas çdo takimi. Të mendojmë për Egnatian dhe të jemi të përqendruar vetëm te kjo ndeshje. Të tjerat le t’i shohim më pas. Është shumë e rëndësishme që të mos dalim pa pikë në këtë takim të radhës. Pjesa tjetër mbetet në dorën tonë”, mbylli Xhambazi prononcimin e tij për gazetën.
