Një ngjarje e rëndë është regjistruar pasditen e sotme në Korçë, ku tre motra të mitura janë dërguar me urgjencë në spital pasi kanë konsumuar disa karamele të gjetura pranë një koshi mbeturinash.
Dyshohet se karamelet kishin përmbajtje lëndësh narkotike (hashash), çka ka sjellë komplikacione të rënda shëndetësore për njërën prej vajzave, vetëm 3 vjeçe. Burime nga spitali bëjnë me dije se e mitura është intubuar dhe ndodhet në reanimacion, ndërsa dy motrat e saj kanë kaluar rrezikun për jetën dhe po mbahen nën kujdesin e mjekëve në pediatri.
Policia ka konfirmuar se karamelet janë gjetur në mbeturina dhe nuk janë marrë nga asnjë person tjetër. Hetimet vijojnë për të zbardhur rrethanat e ngjarjes, ndërsa familjarët dhe të afërmit e vajzave janë marrë në pyetje.
