Skënderbeu fitoi edhe më shumë se prestigji nga finalja e vogël, klubit i ulet një vit dënim nga 10 vjeçari i ‘pambarim’.
Skënderbeu ka fituar edhe më shumë se prestigji i renditjes në vendin e tretë pas fitores ndaj Vllaznisë, të përcaktuar këtë sezon me formulën ‘Final 4’ nga FSHF.
Klubi koçrar ka përfituar në disa aspekte, duke nisur nga një bonus modest financiar, reklamimi që ju bë lojtarëve, disa prej të cilëve objektiv i ekipeve të huaja, por më e rëndësishmja në zbutjen e dënimit 10 vjeçar nga UEFA.
Mësohet se klubit bardhekuq i është ulur një vit nga dënimi, dhe me zyrtarizimin e kësaj ‘amnistie’ të vogël mbeten edhe dy vite të tjerë që Skënderbeu të shikojë dritën jeshile për në kompeticionet europiane të futbollit. Gjithnjë nëse nuk do të ketë zbutje të tjera të dënimit.
Skënderbeu është klubi i vetëm në botë që ka marrë dënimin më ekzemplar të rëndë për trukime ndeshjesh nga qeveria e futbollit. UEFA dënoi klubin korçar me 10 vite pezullim nga të gjitha aktivitetet ndërkombëtare, si dhe 1 milion euro gjobë.
Skënderbeu apeloi çështjen në të gjitha shkallët e gjykimit, por nuk gjeti amnisti as në apelin e UEFAs, as në KAS-in e Lozanës dhe as në Gjykatën Federale. Në vitet e fundit është shpresuar nga klubi pas lobingut që ishte bërë në UEFA, se kjo e fundit do të bënte një amnisti, por që nuk e zbuti ndëshkimin kolektiv sportiv të një qyteti.
