Me këngë, përqafime dhe mall për vendlindjen, banorë dhe ish-banorë të Lavdarit janë mbledhur mbrëmjen e së shtunës në festën e tyre tradicionale, e cila do të vazhdojë edhe nesër. Prej vitesh, data 10 gusht është kthyer në një ditë të shënuar për t’u rikthyer në vendin e të parëve, për të takuar miq të vjetër dhe për të rigjallëruar kujtimet.
Kjo festë mbetet një ngjarje e thjeshtë, pa bujë e reklama, ku rëndësi ka vetëm lidhja mes njerëzve dhe dashuria për vendlindjen. Atmosfera pritet të bëhet edhe më e gjallë të dielën, kur fshati do të mirëpresë edhe më shumë vizitorë nga e gjithë Shqipëria dhe diaspora.
