Luhen fatet e sezonit/ Pas pandemisë, Laçi dominon ndaj Skënderbeut

Skënderbeu luan një ndeshje shumë të rëndësishme dhe tejet deçizive për sa i përket ecurisë së këtij sezoni. Kur mbeten edhe katër javë nga fundi i kampionatit, korçarët janë të fokusuar për të marrë pikët e nevojshme për të shpëtuar një sezon që ka pasur shumë komplikacione dhe vështirësi.

Pengesa e parë është transferta në Kurbin përballë Laçit, një përballje direkte për garën e mbijetesës, që është kaq shumë e rëndësishme për të dyja ekipet. Nisur nga statistikat, korçarët shkojnë në këtë transfertë me një handikap jo pozitiv. Nëse u referohemi përballjeve të luajtura mes dy ekipeve në Laç, Skënderbeu ka vetëm një fitore në tetë ndeshjet e fundit përballë Laçit në transfertë.

Fitore kjo që daton në marsin e vitit të kaluar. Mandej, katër fitore i takojnë Laçit dhe tri ndeshje kanë përfunduar në barazim mes dy ekipeve. Të dhëna këto që nuk favorizojnë aspak korçarët. Nëse bën bilancin total të përballjeve mes dy ekipeve në sezonet e fundit, statistikat janë akoma edhe më negative për korçarët. Kjo, pasi që prej vitit 2020, Skënderbeu ka mundur të fitojë vetëm dy ndeshje në përballjet direkte me Laçit.

Tetë fitore kanë marrë kurbinasit dhe shtatë ndeshje kanë përfunduar në barazim. Këto statistika flasin për një ndeshje të një shkalle vështirësie të lartë. Por, megjithatë, korçarët janë të bindur se specifika e një ndeshjeje nuk është e ngjashme me të kaluarën, prandaj po mundohen të përgatisin takimin në mënyrën më të mirë të mundshme me qëllim që të dalin me një rezultat pozitiv nga kjo transfertë.

Përgatitjet për ndeshjen e së dielës ndaj Laçit kanë filluar qysh të hënën, ditë kur korçarët kanë nisur përgatitjet për ndeshjen e radhës. Ajo që është më e rëndësishme në këtë moment mbetet fakti se edhe për këtë takim bardhekuqtë do të kenë një grup të plotë.