Përgjatë një jave, qytetet e Pogradecit dhe Maliqit mirëpritën Edicionin e 21-të të “ALBAMONO” International Monodrama Festival, një aktivitet kulturor që bashkoi në skenë artistë profesionistë nga tetë shtete të ndryshme, përfshirë SHBA, Poloni, Bjellorusi, Maqedoninë e Veriut, Kroaci, Shqipëri, Greqi dhe Ukrainë. Festivali, i mbështetur nga Bashkia Maliq, Bashkia Pogradec dhe Ministria e Ekonomisë, Kulturës dhe Inovacionit, solli një javë të pasur me shfaqje të veçanta dhe interpretime artistike që ndërthurën traditën me risitë bashkëkohore.
Nata finale në Teatrin e Kukullave, Pogradec, kulmoi me shfaqjen “SarmaTY/YA” të Palina Dabravolskaya Project (Belarus/Poloni), një performancë që ndërthur poezi, elementë folk dhe hip-hop për të rrëfyer historinë e një gruaje në mërgim, duke sfiduar format tradicionale të tregimit teatror.
Gjatë ceremonisë së ndarjes së çmimeve, Juria Ndërkombëtare, e përbërë nga Azzurra De Gregorio (Itali), Anna Mariani (Gjermani) dhe Klajdi Malellari (Shqipëri), shpalli fitues:
- Aktori më i Mirë: Zdravko Stojanov – National Theatre of Bitola, Maqedonia e Veriut
- Aktorja më e Mirë: Danijela Popovic – “Theater 86”, New York, SHBA
- Regjisori më i Mirë: Dimitris Karatzias – Vault Theatre Plus, Athinë, Greqi
- Grand Prix “Dhimitër Orgocka”: Palina Dabravolskaya Project – Belarus/Poloni
Organizatorët shprehën besimin se ky festival do të vazhdojë të zgjerojë pjesëmarrjen ndërkombëtare dhe të sjellë gjithmonë risi artistike për publikun artdashës të zonës.
