30% e fermerëve të qarkut të Korçës nuk kanë përfituar mbështetjen me naftë nga ana e Ministrisë së Bujqësisë.
Madje, fermerë potenciale dhe superpotencialë bëjnë me dije se kanë përfituar nga kjo skemë mbështetje vetëm për një pjesë të sipërfaqeve të tyre dhe jo krej sasinë që duhet të përfitonin.
Fuat Orhan, banor i fshatit Rrembec bën me dije se ka aplikuar për 50 hektarë që ka në pronësi dhe ka përfituar vetëm 25% të sasisë së naftës, e thënë ndryshe nga 3000 litra naftë që duhet të përfitonte fermeri thotë se ka përfituar vetëm 600 litra.
Astrit Xhangoli është një nga fermerët superpotenciale në qarkun e Korçës. Ai ka në pronësi dhe përdorim 150 hektarë të mbjella me kultura të ndryshme bujqësore. Për këtë vit ka përfituar sasinë e naftës vetëm për 20 hektarë. Për pjesën tjetër, sipas tij, për mungesë të plotësimit të dokumentacionit nuk e ka përfituar.
Ai thotë se pa mbështetje kostoja e prodhimit është shumë e lartë.
Një tjetër fermer potencial në qarkun e Korçës është dhe Skënder Hamzaj, banor i fshatit Libonik. Ai thote se nga 20 hektarë që ka në pronësi ka përfituar vetëm gjysmën e kësaj sipërfaqeje.
Të kontaktuar, zyrtarë të drejtorisë së ekstensionit bujqësor bëjnë me dije se në qarkun e Korçës janë 10.700 familje fermerësh. Burimi pranon se 30% e fermerëve nuk kanë përfituar naftë ashtu siç pranon se fermerët potenciale dhe superpotenciale në këtë raund të parë nuk kanë përfituar gjithë sasinë, pasi është menduar shpërndarje edhe për fermerët e tjerë me mbi 1 hektarë sipërfaqe me kultura bujqësore.
