Këtë pasdite Teatri “Andon Zako Çajupi” do të presë në skenën e tij shfaqjen tronditëse “Engjëjt”, një monodramë me autor Odise Plakun, që sjell një mesazh të thellë human dhe historik për publikun shqiptar.
Në qendër të veprës është figura e një nëne nga Kosova, e cila nuk resht së kërkuari të vërtetën për fatin e fëmijëve të saj, të zhdukur gjatë gjenocidit serb. Me një tekst të fuqishëm dhe një interpretim emocional nga aktorja e mirënjohur Vefi Redhi, “Engjëjt” ngjall reflektim mbi dhimbjen e nënës, mbi plagët e luftës dhe heshtjen që nuk duhet të ekzistojë kur fëmijët zhduken, vriten apo vdesin nga uria.
Shfaqja është realizuar nën regjinë dhe adaptimin skenik të Naser Shatrollit, me ndihmën e asistentit të regjisë Shend Tejeci. Skenografia dhe kostumografia janë përgatitur nga Arife Veselaj, ndërsa muzika është kompozuar nga Hajrush Fazliu.
“Engjëjt” është një thirrje për ndërgjegjësim dhe kujtesë, dhe një homazh për nënat që jetojnë me plagën e humbjes. Ajo u interpretua fillimisht në kuadër të Festivalit “Flas Shqip”, dedikuar tematikave shqiptare, dhe tashmë mbërrin në Korçë si pjesë e turit të saj artistik.
Qendra e Artit dhe Kulturës Korçë fton publikun që të marrë pjesë në këtë ngjarje të veçantë artistike.
