Një ngjarje e rëndë është regjistruar pasditen e sotme pranë urës së Maliqit, përgjatë segmentit nacional që lidh Korçën me Pogradecin, ku një person është zbuluar në gjendje të rënduar poshtë urës.
Sipas informacioneve paraprake, familjarët kishin humbur kontaktet me të afërmin e tyre që prej mbrëmjes së kaluar dhe, të shqetësuar për fatin e tij, kishin njoftuar policinë, ndërkohë që vetë kishin nisur kërkimet.
Rreth orës 15:30, pas kërkimeve të vazhdueshme, trupi i mashkullit ende të paidentifikuar u lokalizua nën urë, në kushte të rënda shëndetësore, por me shenja jete.
Ai është transportuar me urgjencë drejt Spitalit Rajonal të Korçës, ku po merr ndihmën e parë mjekësore. Burime nga spitali bëjnë me dije se i dëmtuari reagon dhe aktualisht është nën vëzhgim të mjekëve.
Ndërkohë, në vendin e ngjarjes ndodhen forca të shumta policie dhe efektivë të qarkullimit rrugor, të cilët po hetojnë nëse bëhet fjalë për një aksident rrugor apo për një rrëshqitje aksidentale.
Grupi hetimor ka nisur veprimet për të sqaruar rrethanat dhe shkakun që çoi në këtë situatë, ndërsa pritet edhe identifikimi zyrtar i të dëmtuarit.
