Maturantët në të gjithë vendin do t’i nënshtrohen nesër provimit të parë të Maturës Shtetërore 2025, i cili do të jetë në lëndën e Gjuhës së Huaj. Lajmi është bërë i ditur nga Ministrja e Arsimit dhe Sportit, Ogerta Manastirliu, përmes një postimi në rrjetet sociale, ku ka ndarë edhe disa nga rregullat kryesore që duhet të ndjekin maturantët gjatë provimeve.
Sipas njoftimit, nxënësit duhet të paraqiten në ambientet e shkollës në orën 08:30, ndërsa provimi do të nisë në orën 10:00 dhe do të zgjasë deri në 12:30.
Ministrja theksoi se çdo maturant duhet të ketë me vete një mjet identifikimi (kartë ID ose pasaportë), dy stilolapsa, vizore të vogël dhe, nëse është e nevojshme, një makinë llogaritëse të thjeshtë. Gjithashtu, nxënësit duhet të jenë të veshur me uniformën e shkollës, ose në mungesë të saj të veshin bluzë dhe xhinse, të kenë me vete shishe uji dhe të jenë ushqyer mirë në shtëpi.
Ndërkohë, është rreptësisht e ndaluar marrja me vete e telefonave celularë apo orëve inteligjente (smartwatch). Rregullat e testimit përfshijnë përdorimin e një stilolapsi me një ngjyrë, firmosjen para dhe pas dorëzimit të testit dhe ndalimin e largimit nga ambienti i provimit përpara orës 12:30.
“SUKESE të gjithëve!”, përfundon mesazhin e saj ministrja Manastirliu, duke u shprehur mbështetje maturantëve në këtë fazë të rëndësishme të rrugëtimit të tyre arsimor.
