Lagjet 11 dhe 12 të qytetit të Korçës mbajnë një peshë të veçantë në zemrat e banorëve. Për Ilirian Pendavinjin, një bir i Lagjes 2, këto lagje janë më shumë sesa një pjesë e qytetit — janë një kujtim i gjallë i fëmijërisë, miqësive të sinqerta dhe dashurisë së jetës.
“Edhe pse jam djalë i Lagjes 2, pikërisht këtu, mes rrugicave të Lagjeve 11 dhe 12, kam kaluar disa nga kujtimet më të bukura të fëmijërisë. Kam gjetur miq përjetë, dhe më e rëndësishmja, kam gjetur gjysmën time, bashkëshorten time, Elian,”
Ai rikthehet sot në këto lagje jo vetëm për të përkujtuar të kaluarën, por për të ndërtuar një të ardhme të përbashkët me qytetarët korçarë. Me një thirrje të sinqertë, ai fton komunitetin të ecin së bashku drejt së ardhmes, në një rrugëtim të përbashkët drejt familjes evropiane.
“Korça ka qenë gjithmonë qytet i kulturës, i vlerave dhe i dashurisë për atdheun. Është koha të sjellim këto vlera në qendër të vendimmarrjes dhe të punojmë për një të ardhme që i ngjan më shumë ëndrrave tona,” theksoi ai.
