Pas pesë ditësh të vështira me flakë që rrezikonin zonat pyjore dhe ekosistemin në Parkun Kombëtar të Prespës, në territorin e Bashkisë Pustec, situata është vendosur tashmë plotësisht nën kontroll. Zjarri është neutralizuar, ndërsa vatrat e tjera të mëparshme në juglindje janë gjithashtu te shuara.
Përgjatë këtyre ditëve, mbi 100 forca të shërbimit zjarrfikës, ushtrisë dhe stafit të Agjencisë Rajonale të Zonave të Mbrojtura kanë qenë të angazhuara në terren. Ata kanë punuar pa ndërprerje, shpesh në kushte të vështira atmosferike, për të frenuar përhapjen e flakëve dhe për të mbrojtur zonat me vlerë natyrore.
Aktualisht, strukturat përgjegjëse vijojnë me monitorimin e vazhdueshëm në të gjitha zonat e prekura, me qëllim garantimin e sigurisë dhe parandalimin e çdo riaktivizimi të mundshëm të vatrave.
Prefektura e Qarkut Korçë ka falënderuar të gjitha forcat e angazhuara për profesionalizmin dhe përkushtimin, duke vënë në dukje rëndësinë e bashkëpunimit ndërinstitucional në raste emergjencash mjedisore.
