Pëllumb Korfuzi, komisari i policisë me dorë të hekurt rendi që u refuzua si Qytetar Nderi i Korçës.
Drejtoria Rajonale e Policisë Korçë në ambjentet e saj ka një lloj shenjtërimi. Pak kush e di, dhe ca më pak e kujton, se këtu rreth 30 vite më parë është kryer një ritual i pazakontë fetar. Mes ca gërmadhave që ishin prishur diku në krah të pallatinave simbolike për Korçën, një prift bekonte nisjen e punimeve për një tip magazinë, dhe aty mes pirgut të gurrëve shfaqej krenar e triumfator shefi i komisariatit të aso kohe Pëllumb Korfuzit.
Kuçovari shtatshkurtër dhe ambicioz si Napoleon Bonaparti kishte arritur në majën e shkëlqimit të pushtetit të tij policor në Korçë. Ishte mbiquajtur tashmë si Katani, personazhi i njohur i komisarit të policisë në filmin italian “La Piovra”, dhe me një mbështetje pa rezerva nga Ministri i Rendit Publik Agron Musaraj zotëronte si i plotfuqishëm.
Me nisje të karrierës në komisariatin e Librazhdit, ku fillimisht u bë i njohur për postbllokun e ngritur nga policia në aksin Korçë-Elbasan-Tiranë e kthim, Pëllumb Korfuzi u transferua me ngritje në detyrë si shef komisariati në Pogradec.
Ishin vitet e para të asaj periudhe që njihet si “era e demokracisë” në një situatë mish mash të lirisë dhe rendit për shqiptarët. Pasi la proçese gjyqësore në Gjykatën e Faktit në Pogradec për ushtrim dhune, aty nga fillimi i vitit 1995 Pëllumb Korfuzi ngjiti shkallën më të lartë të kryepolicit në komisariatin e Korçës. Aso kohe, kjo detyrë ishte pothuaj me atributet që ka Drejtori i policisë sot, pasi nuk ishte ky funksion në Policinë e Shtetit.
Korça rreth vitit 1995 kishte një lloj problematike të rendit dhe tensionim social me të ashtuquajturat “banda” rivale dhe Pëllumb Korfuzi u zgjodh si dora e hekurt për të vënë rregull në qendrën e juglindjes. Të paktën kështu e konsideruan funksionarë lokalë dhe deputetë të PD në atë kohë, përderisa e motivuan kërkesën e tyre që komisari i policisë Pëllumb Korfuzi të shpallej “Qytetar Nderi” i Korçës.
Ky propozim nuk erdhi rastësisht. Katani i Korçës tashmë ushtronte një pushtet policor thuajse absolut. Kishte vënë kontroll mbi rendin, propozoi i pari vendosjen e kamerave të sigurisë në pika kyçe të qytetit duke shtrënguar edhe bizneset të paguanin gara në këtë inisiativë, dhe me një ide të çartur propozoi dhe ngriti grup-seksionet qytetare të informimit për ngjarjet dhe sigurinë e rendit publik.
“Ishte një takim gati ushtarak për nga gadishmëria dhe nënshtrimi i pjesmarrësve në atë takim që u mbajt në sallën e teatrit Andon Zako Çajupi për formalizimin e grup-seksioneve qytetare. Askush nuk pipëtinte në sallën e mbushur plot, vetëm ishin gati të shpërthenin në duartrokitje frenetike për këtë nismë, teksa Pëllumb Korfuzi i qetë për gjithçka do të miratohej aty, merakun e vetëm kishte me dy përfaqësues të medias së shkruar të ulur në lozhë” kujton gazetari Gëzim Hashimi.
I vetmi komisar policie që nuk ndalej para askujt dhe për asnjë qëllim të tij në tokën e butë qytetare të Korçës. Derisa synoi titullin honorifik “Qytetar Nderi” duke ditur tashmë se pushteti i tij nuk kishte asnjë rezistencë që ta pengonte në glorifilimin e figurës si komisar Katani.
Dhe në fakt ndodhi, por siç thuhet maja e malit sjell edhe tatëpjetën. Këshilli bashkiak i Korçës, me vota thuajse unanime e miratoi akordimin e titullit “Qytetar Nderi”. Ndërsa kryetari i bashkisë i asaj kohe Gjergji Gjinko ka lënë shenjën më të fortë të kurajos qytetare duke refuzuar të firmosë vendimin.
“Zhvillonim mbledhje javore me përfaqësuesit kryesorë të institucioneve për çështjet e rendit dhe sigurisë. Kryetari i bashkisë Gjergji Gjinko ju drejtua këshilltarit Stavri Frashëri dhe i tha që ishte turp i Korçës të vlerësohej Qytetar Nderi një shef komisariati që akuzohej për dhunë. Këshilltari u justifikua që Pëllumb Korfuzi kishte meritë se i doli për zot Korçës duke vendosur rendin publik” kujton një vartës i afërt i Pëllimb Korfizit që ishte i pranishëm në këtë takim.
“Hakmarrja” e Pëllumb Korfuzit mund të arrinte deri aty sa të dërgonte në qeli edhe vetë kryetarin e bashkisë. “Ishte fillimi i vitit të ri 1996, Korfuzi pasi kishte festuar në Berat me Ministrin Agron Mustaraj, sapo erdhi në Korçë dha urdhër për një ndalim. Kishte parë mjetin e Ndërmarjes të Ujësjellësit të parkuar për arsye pune diku te ish fabrika e lëkurës dhe urdhëroi shoqërimin e inxhinierit. Kur reagoi kryetari i bashkisë Gjergji Gjinko për këtë ndalim duke turbulluar kërkoi edhe shoqërimin e tij nga grupi i gatshëm por ky urdhër nuk u zbatua” tregon oficeri i policisë që mbante komandën e drejtimit pas Pëllumb Korfuzit.
Nuk vonoi shumë, dhe diku nga muaji shkurt i vitit 1996 Pëllumb Korfuzi, një nga drejtuesit e policisë me dorën më të ashpër të punës në Korçë të largohej përfundimisht nga kryeqendra e juglindjes dhe të mbyllte karierën e tij me bëma të shumta. Korça që ju nënshtrua përkohësisht shfrenimit të një “Napoleoni” policie, e refuzoi për Qytetar Nderi.
