Ditë vendimtare për qytetin e Pogradecit. Edhe gjithë vëmendja është përqendruar në “Elbasan Arena”, ku mezi presin suksesin e radhës së skuadrës së drejtuar nga trajneri Ardian Mema. Pas suksesit në Burrel, liqenorët kërkojnë edhe “kokën” e Besës në finale e “play off”-it, takim i cili do të luhet sot në orën 17:00 në stadiumin “Elbasan Arena”.
Për momentin, skuadra pogradecare po kalon një moment pozitiv, gjë e cila është përkthyer në rezultate që askush nuk i kishte menduar në fillim të sezonit, ku liqenorët vinin nga Kategoria e Dytë në të Parën. Pa dyshim, ky progres i futbollit pogradecar ka ardhur edhe nga investimet e kryera nga presidenti i klubit, Armando Lilo, i cili në merkaton e dimrit bëri disa afrime cilësore. Motivimi i presidencës nuk i ka munguar skuadrës as në këtë fundkampionati, duke shpërblyer lojtarët për fitoret e arritura. “Panorama Sport” mëson se për fitoren në finalen e parë të “play off”-it ndaj Burrelit, presidenti Lilo ka shpërndarë një premio rreth 15 mijë euro për skuadrën. Pa diskutim, shpërblimi nuk do u mungojnë liqenorëve edhe për ndeshjen e sotme me Besën, shifër e cila pritet të jetë shumë më e lartë se ajo që presidenti shpërndau për skuadrën pas fitores kundër matjanëve.
Organizimi– Presidenca e klubit, si dhe Bashkia e Pogradecit, nuk do të kursehen as për tifozët, ku pritet një transfertë masive drejt Elbasanit në mbështetje të skuadrës. Drejtuesit kanë vendosur autobusë pa limit për tifozët që duan të udhëtojnë nga Pogradeci drejt Elbasanit. Jo vetëm udhëtimi, por edhe hyrja në stadium e tifozëve pogradecarë do të jetë falas, pasi janë drejtuesit ata që do t’i shlyejnë të gjitha shpenzimet, vetëm e vetëm që ekipi ta ketë mbështetjen e duhur ndaj Besës.
Në qytetin liqenor prej ditësh janë bërë gati për këtë ndeshje kaq të rëndësishme. Protagonistët e Pogradecit, në prononcimet dhe postimet e bëra në ditët e fundit, kanë shprehur optimizëm se do ta kalojë edhe Besën. Sot, duke filluar nga ora 14:00, nisja e tifozëve do të bëhet nga ambientet e stadiumit të Pogradecit.
Prej ditësh motoja e pogradecarëve është: Së bashku, më të fortë se kurrë!
