Kryeministri Edi Rama në vijim të dialogut në bashkitë e vendit, ishte i pranishëm në prezantimin e projekteve për bashkinë e Ersekës, ku u fokusua tek potencialet e mëdha të zonës sa i takon turizmit.
Rama vuri në dukje se pak vite më parë askush nuk e mendonte se turistë apo vizitorë vendas e të huaj të dyndeshin në Kolonjë, siç kanë filluar të vijnë.
“Por nëse sot kjo shifër 20 mijë bën përshtypje. Unë u them me bindjen më të plotë, se do të shkojë 200 mijë vizitorë vendas dhe të huaj që do të vijnë në këtë vend të bekuar për të qëndruar të paktën një natë. Dhe kjo do të thotë një transformim i të gjithë ekonomive familjare këtu në Kolonjë”, tha ai.
Rama shtoi se e ardhmja e afërt e Kolonjës do të jetë turizmi, sepse është një zonë me bukuri përrallore dhe të cilës i mungon vetëm një gjë për t’u bërë shumë më e frekuentuar, që është pikërisht ajo që tashmë po bëhet, një lidhje shumë më të shpejtë me Korçën.
“Kolonja, deri para pak kohësh e ka vuajtur ndarjen dhe largësinë e imponuar për shkak të kësaj lidhjeje me Korçën, ndërkohë që Korça do të përfitojë nga lidhja më e afërt me Kolonjën, sepse Kolonja do të jetë një arsye më e madhe që turistët të rikthehen.”
Ai tha se në Kolonjë po zhvillohet një nga investimet strategjike në fushën e energjisë për vendin, jo vetëm për zonën.
“Investimi në një park të madh 40 megavat me energji diellore. Një investim i bërë nga një familje. Babai me dy djemtë, të cilët pasi kishin studiuar në Angli ishin kthyer këtu për t’i dhënë jetë kësaj sipërmarrjeje. Kjo është një shenjë tjetër për ata që Kolonja ka një potencial të fshehur së bashku me bimët medicinale, për të cilat unë besoj se së shpejti Erioni do të ndërtojë një pikë të madhe grumbullimi dhe përpunimi, që është një ekonomi e madhe”, tha Rama.
