Pak më parë, ekipi i Pogradecit doli me një deklaratë zyrtare kundrejt një goli të anuluar në minutën e 91-të në sfidën e sotme kundër Lushnjes e vlefshme për javën e 25-të të Kategorisë së Parë.
Në këtë deklaratë zyrtare, klubi liqenor që synon ngjitjen në Kategorinë Superiore për sezonin e ardhshëm, ka shpallur “persona non grata” dy prej arbitrave të sotëm.
Bëhet fjalë për kryesorin Florjan Lata dhe arbitrin anësor Xhuljo Mani që drejtuan sot takimin Pogradeci-Lushnja. Të dy emrat e mësipërm janë të nderuar dhe me stemën e FIFA-s.
Këtë sezon, Lata ka vënë drejtësi në 7 ndeshje në Superiore, 4 takime në Kategorinë e Parë, 3 ndeshje në Champions League të të rinjve, dhe nga 2 takime në kualifikueset e Conference League dhe në kualifikueset e europianit U-17.
Gjithashtu dhe gjyqtari Xhuljo Mani ka vënë drejtësi këtë sezon në ndeshje të rëndësishme në Superiore, Kupën e Shqipërisë, Kategorinë e Parë, kualifikueset e europianit U-19, Conference League, Champions League për të rinj.
