Viti i ri akademik 2025–2026 vjen me një risi të rëndësishme për Fakultetin e Bujqësisë në Universitetin “Fan S. Noli” të Korçës. Pranë Departamentit të Agronomisë do të ofrohet programi i ri i studimit “Master i Shkencave në Shkencat Bujqësore”, duke krijuar një mundësi unike për studentët që duan të thellojnë njohuritë dhe kërkimin shkencor në fushën e bujqësisë.
Ky program ofron përgatitje të avancuar teorike dhe praktike, duke i pajisur studentët me aftësitë e nevojshme për të kontribuar në zhvillimin e qëndrueshëm rural, inovacionin në prodhimin bujqësor si edhe përballimin e sfidave mjedisore dhe ushqimore.
Sipas përgjegjësit të Departamentit të Agronomisë, prof. as. dr. Adrian Maho, qëllimi është përgatitja e shkencëtarëve të rinj, pedagogëve, sipërmarrësve, specialistëve dhe drejtuesve të administratës publike apo biznesit privat në mënyrë gjithëpërfshirëse.
Me këtë nismë, Universiteti “Fan S. Noli” synon të formojë gjeneratën e parë të specialistëve me diplomë Master i Shkencave në Shkencat Bujqësore, duke hapur një perspektivë të re për arsimin dhe zhvillimin e sektorit bujqësor në vend.
