Një zjarr masiv përfshiu një banesë kolektive mbrëmjen e sotme në lagjen numër 4 të qytetit rruga “Gani Homçani”. Sapo morën njoftim në vendngjarje mbërritën forcat e MZSH Pogradec si fillim 1 mjet dhe më pas edhe 2 të tjerë ndërsa një mjet i katërt u dërgua nga Bashkia Maliq.
Menjëherë zjarrfikësit sëbashku me policinë dhe banorë të zonës si fillim kanë bërë evakuimin e banorëve nga banesat dhe të një 80 vjeçari i cili ishte brenda banesës që po digjej.
Më pas është organizuar puna për të bërë të mundur menaxhimin, izolimin dhe fikjen totale të zjarrit. Përmasat e zjarrit ishin të mëdha dhe të rrezikshme. Zjarrfikësit kanë bërë të pamundurën për të minimizuar dëmet dhe për të mos pasur të lënduar apo lejuar përhapjen në godinat shumë pranë vatrës.
Zjarri tashmë është fikur dhe në mëngjes grupi i emergjencave civile do të kryejë të gjitha procedurat ligjore për të bërë më pas dëmshpërblimin e banorëve të prekur nga flakët. Përgëzime efektivëve zjarrfikës, policisë dhe çdokujt që ndihmoi për të mos patur situata edhe më të rënda.
Ndërkohë një apel vjen nga bashkia Pogradec për të gjithë banorët që në këtë periudhë të vitit të marrin masa për pastrimin e oxhaqeve, pasi shumica e zjarreve që bien vijnë si pasojë e mos pastrimit të tyre.
