Një vatër zjarri u shënua pak momente më parë në fshatin Kriçkovë, njësi administrative Proptisht, në territorin e Bashkisë Pogradec. Flakët përfshinë një zonë me bimësi të thatë dhe shkurre, duke rrezikuar seriozisht disa banesa të afërta.
Fatmirësisht, reagimi i menjëhershëm i banorëve të zonës dhe punonjësve të njësisë administrative bëri të mundur izolimin e zjarrit në kohë, duke parandaluar përhapjen drejt banesave dhe dëme të mundshme materiale.
Në vendngjarje kanë mbërritur edhe forcat zjarrfikëse, të cilat janë angazhuar në operacionin për shuarjen e plotë të vatrës. Ekipet e ndërhyrjes po qëndrojnë në zonë për të garantuar që nuk do të ketë riaktivizim të flakëve, duke pasur parasysh kushtet e thata atmosferike dhe rrezikun e lartë gjatë kësaj periudhe.
Autoritetet vendore i bëjnë thirrje qytetarëve të tregojnë kujdes.
